BR LA UNION – Tiniliw ti Bureau of Customs (BOC) Iti maysa nga oil tanker a nagkarga ti mapattapatta a P219.5 million a balor ti smuggled oil ditoy La Union.
Nangisayangkat ti ahensiya iti intelligence ken enforcement operations a kadua ti Philippine Coast Guard (PCG) Task Force Aduana ken National Bureau of Investigation-Organized and Transnational Crime Division (NBI-OTCD), kalpasan a nakaawatda iti report maipapan iti “paihi” modus, wenno illegal oil transfer, iti La Union Port .
Impaganetget ni BOC Commissioner Bien Rubio a kasapulan a mapapigsa ti operasyon kontra iti illegal a panagiserrek dagiti saan a markado a gasolina iti pagilian, agsipudta saan laeng a maka-apektar iti ekonomiya ngem ketdi, mangigubway pay ti peggad kadagiti saan a maka-ammo a konsumer.
Segun iti BOC, rimuar iti umuna nga imbentaryo nga adda 200,000 a litro ti diesel fuel iti barko, malaksid pay iti kanayunan a 59,000 a litro a gasolina iti dua a lorry truck.
Napaay dagiti sangapulo a tripulante ti barko a maka-idatag iti legal a dokumento, a pagibasaran ti operasyon dagitoy.
Malaksid kadagiti tripulante, inaresto pay dagiti otoridad dagiti 11 pay nga indibidual a nagserbi a drayber, kargador, observer, ken kakumplot.
Kaso nga administratibo ken kriminal iti sangwen ita dagiti akinkukua, kapitan ti barko, ken tripulante ti MT Bernadette ken dagiti lorry truck, kasta met iti akinkukua iti nakumpiskar a diesel fuel gaputi panaglabsingda iti Customs Modernization and Tariff Act (CMTA) ken Tax Reform for Acceleration and Inclusion (TRAIN) Law.
