Ibutaktak aminen ni Brice Hernandez dagiti amin nga ammo na maipanggep iti korapsyon a mapaspasamak kadagiti flood control projects.
Segun kenni Atty. Raymond Fortun, nagdesisyon ni Hernandez kadagiti napalabas a lawas a makitinnulong isuna kadagiti serye ti imbestigasyon, saan laeng nga iti congressional hearing no di ket pati pay iti Independent Commission on Infrastructure (ICI).
Maipalagip nga impaima ni Hernandez iti luxury car na iti ICI kas panangipakita ti sinseridad, ken maysa pay a nginginaen nga sports car iti nakaituding nga isuko na kadagiti sumarsaruno nga aldaw.
Daytoy nga addang iti nangited-dalan tapno maipaayan isuna ti seguridad babaen ti Witness Protection Program (WPP) gapo kadagiti nadadagsen ken sensitibo nga impormasion nga imbutaktak na ken dagiti posible pay nga iruar na.
Ipaima na metten iti computer na iti ICI kasaruno ti immunan a panangipaay na dagiti sumagmamano a sensitibo a dokumento iti Senado ken ti nasao a komisyon. Nakailanad ditoy dagiti napapateg nga ebidensya ken impormasyon maipanggep iti panakairaman dagiti sumagmamano nga indibidual iti flood control scandal.###
