Suportaran laeng ti minority bloc iti independent commission nga agimbestigar kadagiti maanomalya a flood control projects no dagiti nadutokan a miembro ket nawaya manipud iti impluwensia ti pulitika ken dadakkel a negosyo.
Segun kenni Senate Minority Leader Alan Peter Cayetano, pabor isuna iti ideya ti komisyon ngem kasapulan pay a pagsasaritaan ti minorya no suportaran da daytoy.
Dinutokan ti Malacañang kas miembro ti komisyon da sigud a DPWH Secretary Rogelio Singson, SGV Country Managing Partner Rossana Fajardo, ken Baguio City Mayor Benjamin Magalong.
Dinakamat ni Cayetano a napateg iti kredibilidad ti komision tapno saan a mapukaw ti panagtalek ti publiko iti imbestigasion kangrunaan no adda ti panawen nga agparparang nga adda ti pabpaboran da wenno addaan ti political agenda.
Addaan met ti panagdudua iti minority bloc iti posibilidad ti conflict of interest, ngem mangnamnama da a saan a mausar daytoy para iti political interest kangrunaan no maikonektar iti 2028 elections.
Kabayatanna, iti maysa a press conference a naisayangkat ita nga aldaw, imbaga ni Senador Rodante Marcoleta a suportadona iti nabukel nga independent commission for infrastructure.
Impaganetget na a rumbeng ket kualipikado dagiti miembro ken nalawag a mangipeksa a saan da a tumaray inton eleksion.###
