Maminsan manen a nagballaag ti Bureau of Immigration kadagiti indibidual a mangilemlemmeng kadagiti POGO workers nga agtultuloy a birbiruken da.
Daytoy ket gapu ta nalpasen ti Disiembre 31, 2024 a deadline tapno i-downgrade ti visa da iti tourist visa kalpasan iti direktiba a total ban ti gobierno ti Pilipinas ti amin nga adda pakainaiganna kadagiti POGOs.
Segun iti BI, ti siasinoman a maduktalan a mangiduldulin kadagiti ganggannaet a trabahador ti POGO ket mabalin a sumango iti katupag a kaso kriminal.
Inawaganna pay ti publiko a dagus nga ireport iti opisinada ti aniaman a napateg nga impormasion mainaig kadagiti wanted POGO workers nga agingga ita ket nagkedked a pumanaw ditoy pagilian.
Maibilang dagitoy nga illegal aliens gapu ta paso aminen dagiti dokumentoda.
Maibasar iti datos, adda nasurok a 11,000 a ganggannaet a trabahador ti POGO a saan pay a nagsurrender kadagiti otoridad.
Daytoy ket manipud iti agdagup iti 33,863 a foreign nationals a manamnama a papanawen ti BI ngem 22,609 laeng a trabahador ti POGO ti naisubli iti bukodda a pagilian.
