Nagkiddaw ni Department of Migrant Workers Secretary Hans Leo Cacdac iti makalawas tapno adalen ti total deployment ban kadagiti domestic workers idiay Kuwait.
Iti panagdengngeg ti Senate Committee on Migrant Workers and Labour and Employment, indagadag manen ni Senador Raffy Tulfo iti DMW nga iyemplementaren ti deployment ban kadagiti overseas Filipino workers (OFWs) idiay Kuwait kalpasan ti pannakatay dagiti dua nga OFWs nga isuda Dafnie Nacalaban ken Jenny Alvarado.
Binilin ti senador ti ahensia nga umuna nga iparitda ti pannakaipatulod dagiti first time Filipino workers idiay Kuwait ngem kunana a para kadagiti sigud a domestic ken skilled workers iti nasao a pagilian ket awan ti problema ti deployment da.
Inyunay-unay ni Tulfo, awan ti problema dagiti OFW no di ket dagiti employers idiay Kuwait a mangab-abuso kadagiti kailian tayo, isu ti gapuna nga adda pay laeng dagiti Pilipino a bangkay da lattan iti agaw-awid.
Segun iti MCacdac, iti agdama ket awan pay ti ipatpatungpal ti pagilian nga total ban iti pannakaideploy dagiti OFWs idiay Kuwait ngem ti laeng adda ket ti deferment.
Manipud iti murder case ni OFW Julibee Ranara idi 2023, impatungpal ni sigud a Secretary Toots Ople ti deferment wenno ban iti panangipatulod kadagiti first time Filipino workers idiay Kuwait.
Inpakaammo ni Department of Foreign Affairs Undersecretary Eduardo de Vega a posible ti pannakaipatungpal ti naan-anay a total ban kadagiti household workers idiay Kuwait gapu ta naaramiden dayta iti Indonesia – nu sadino ket in-ban da met ti pannakapaitulod kadagiti household workers da idiay Middle East.
