BR LA UNION – Inaklon ni Centerways Construction and Development Inc. president Lawrence Lubiano a nangted isuna ti ₱30 million a campaign donation kenni Senador Chiz Escudero idi 2022 elections.
Daytoy ket laksid kunana nga adda agraraira a kontrata ti kompanya na iti gobyerno sipud pay idi 2009.
Iti panagdngngeg ti House Infra Comm, sinalodsod ni Akbayan Party-list Rep. Chel Diokno ni Lubiano seknan dagiti kontrata nga iggem ti Centerways, partikular iti Bicol region ken nasurok 30 a proyekto idiay Sorsogon.
Kinumpirma ni Lubiano a nabayagen a makipas-paset iti government projects ti kompanya na sipud pay idi 2009 ken nakailista ti proyekto idiay Albay, Camarines Sur, Cebu ken Masbate.
Inaklon ni Lubiano a manipud 2022 agingga ita a tawen ket aganay 80 a proyekto ti na-bid ti kompanya na.
Inlawlawag ni Lubiano a personal donation ti impaay na kenni Escudero ken saan a kunana a naggapo iti kompanya.
Maibasar iti Section 95 letter C ti Omnibus Election Code, maipawil kadagiti government contractor ti gobyerno a mangipaay ti donasyon kadagiti kandidato.
