BR LA UNION – Pagpalpalawagen ita ti Commission on Higher Education (CHED) iti private college idiay Quezon City gapu iti iligal a panangisayangkat ti off-campus activity.
Segun kenni CHED Chairperson Prospero De Vera, nangiruar da ti show cause order iti Bestlink College of the Philippines kalpasan a nagrambak da ti founding anniversary iti maysa a resort idiay Bataan.
Agparparang nga awan ti dokumento a naisumite iti opisina ti CHED para iti nasao nga aktibidad.
Nabilin metten ni CHED National Capital Region director Jimmy Catanes nga imbestigaran iti insidente ken pinagbayad dagiti estudyante idinto nga awan ti panniguro para iti seguridad ti pagluganan dagitoy.
Sumagmamano a reklamo dagiti estudyante ket iti kaawan ti lugan a nagsubli idiay Manila ken kinakurang ti nagdagusan da iti nasao a resort.
Nagna pay ti sumagmamano a kilometro dagiti agad-adal a nagturong iti resort gapu iti kaadayu ti paradaan ti bus.
Mangisay-sayangkat metten iti imbestigasyon iti Quezon City Goverment seknan iti isyu.
Maipalagip nga idi Pebrero 2017 na-loss control iti bus a nagluganan dagiti estudyante ti Bestlink bayat ti panagturong da iti field trip ket naidungpar da iti poste ti kuryente idiay Tanay, Rizal a nakatayan ti 15 a tattao ken nakasugatan ti 40 nga agad-adal iti nasao a kolehiyo.
