BR LA UNION – Inarestar dagiti otoridad ti maysa a chicken breeder kalpasan a naglako ti maipagarop a shabu iti poseur buyer.
Daytoy ket babaen ti anti-illegal drugs operation nga insayangkat ti Naguilian Police Station, kadwa da ti Provincial Intelligence Unit ken Provincial Drug Enforcement Unit iti La Union Police Provincial Office.
Naisayangkat ti operasyon idiay Sitio Sulcoc, Brgy. Dal-lipaoen, Naguilian, La Union idi November 28, 2025.
Ti suspek ket maysa a lalaki, agtawen ti 41 ken residente ti Brgy. Natividad, Naguilian, La Union.
Iti panagsukimat dagiti otoridad, nakumpiskar da manipud iti suspek ti maipagarop a shabu ken marijuana.
Mapatta-patta nga agbalor ti ₱18,020 iti nakumpiskar a 2.65 gramo ti maipagarop a shabu ken ₱270 nga standard drug price (SDP) ti 2.25 gramo ti dried marijuana leaves, ken sumagmamano a piraso ti non-drug items.
Ti suspek ket nakabalud itan ken sumangsango ti kaso a panaglabsing iti Comprehensive Dangerous Drugs Act of 2002.
