Saan a rumbeng nga ikankano ti internasional a komunidad ti pannakibiang ti China idiay West Philippine Sea, segun iti maysa nga opisial ti Philippine Coast Guard (PCG).
Bistadon ni PCG Spokesperson for the WPS Commodore Jay Tarriela ti estratehia ti China a mangusar iti fabricated nine-dash line tapno mainkalintegan ti panagtalinaed dagiti barkoda iti nasao nga kabaybayan.
Kinunana nga awanen ti sabali a panggep ti China no di ket ti panang-normalize ti pannakaipatulod dagiti barkoda.
Inawaganna ti ar-aramiden ti China a kas “strategy of normalization” tapno mabaliwan ti status quo iti taaw tapno maikalintegan ti “illegal narrative” iti panagtagikua kadagiti teritorio.
Amin dagitoy, kinuna ni Tarriela, ket paset ti aw-awagan na kas “China playbook”.
No palubosan ti internasional a komunidad ti kayat ti China a mapasamak iti illegal deployment-na kadagiti barko, kinunana nga ad-adda nga agbalin a natured ti China a makibiang iti exclusive economic zone (EEZ) dagiti dadduma a pagilian iti Asia kas kadagiti Vietnam, Brunei, Malaysia, ken Indonesia.
