Im-imbestigaran ti Presidential Anti-Organized Crime Commission (PAOCC) dagiti report mainaig iti panaggatang dagiti Chinese nationals iti nalalawa a daga sadiay Central Luzon.
Impalgak ti hepe ti PAOCC a ni Gilbert Cruz a nakaawatda iti impormasion nga adda dagiti Chinese nationals nga agab-abang ken gumatgatang kadagiti sanikua ken uray pay agbayadda iti agingga iti P90,000 kada ektaria para iti taltalon.
Inlawlawag ti opisyal nga imbes nga agmula dagiti mannalon, bayadan latta isudan dagiti Chinese ken makakaammo dan nu ania iti aramiden da kadagiti daga.
Impasingked ti opisyal ti PAOCC a kasapulan a maimbestigaran daitoy agsipud ta makitkitaan iti insidente kadagiti posible a parikut iti masakbayan nangruna iti panangkontrol kadagiti lokal a talon.
Daitoy a rebelasyon ti opisyal ti PAOCC ket adda iti tengnga ti nainget a nationwide crackdown kadagiti POGO hubs ditoy pagilian a kadawyan a pakairamanan dagiti ganggannaet, partikular dagiti Chinese a kadawyan a karaman kadagiti illegal nga aktibidad kas iti human trafficking.
