BR LA UNION – Inakusaran ti Chinese Embassy idiay Manila ni Philippine Coast Guard (PCG) spokesperson for the West Philippine Sea Commodore Jay Tarriela, a maipagarop nga agul-ulbod manen.
Inaramid ni Chinese Embassy Deputy Spokesperson Guo Wei ti waragawag kontra kenni Commodore Tarriela kasaruno ti claim na a kaatnuman ket saan nga immasideg dagiti barko ti Philippine Coast Guard iti sadinuman a reef wenno bahura nga iman-manehar ti China, a maipagarop a saan laeng nga inaccurate ngem ketdi adayu iti reyalidad.
Immuna nga imbaga ti Chinese embassy official dagiti maipagarop nga insidente a napasamak iti napalabas a tawen, a maipagarop nga immasideg iti aircraft ti PCG iti sumagmamano a paset ti tag-tagikuaen a kabaybayan ti China kabilang idiay Spratly Islands nga aw-awagan da a “Nansha Qundao” iti nasurok mamin-200 a daras kabilang iti overflight idiay Meiji Jiao (Mischief Reef wenno Panganiban Reef), ken idiay Nanxun Jiao ken simrek pay ti PCG vessels iti kabaybayan nga asideg idiay Zhubi Jiao (Subi Reef) ti namin-adu a daras iti umuna a paset ti tawen 2026.
Maikadwa kuna ni Wei, ti maipagarop a panangipanetget ni Comm. Tariela a ti China ket paset laeng iti pagi-innagawan a kabaybayan, banag a maipagarop a panangkontra iti Declaration on the Conduct of Parties iti disputed waters ken United Nations Convention on the Law of the Sea (UNCLOS).
Inakusaran pay ti Chinese embassy iti Philippine personnel a namin-adu a daras a ginandat a sakupen iti uninhabited features kas ti Tiexian Jiao wenno nalatak kas Sandy Cay wenno Pag-asa Cay 2 ken Xianbin Jiao (Sabinal Shoal wenno Escoda Shoal), a maipagarop a panaglabsing iti Article 5 iti Declaration on the Conduct od Parties.
Dinakamat pay ti embahada iti iligal a pannakaisadsad ti barko ti Pilipinas idiay Ren’ai Jiao (Second Thomas Shoal wenno Ayungin Shoal) iti uneg ti nasurok dua a dekada.
Maikatlo, iti pagparangen a dagiti barko ti Pilipinas ti maipagarop a biktima ti panangbully ngem saan a mairam-raman nu mamin-ano nga aglayag asideg kadagiti isla ken bahura ti China.
Inaramid ti Chinese embassy official iti waragawag kasaruno ti inyisyu nga statement ni Comm. Tarriela idi Pebrero 13 kas sungbat iti indatag a concern ni Senator Alan Peter Cayetano a maipagarop a saanda nga agibagbaga ti pudno kadagiti Pilipino.
Inlawlawag ni Comm. Tarriela a kaatnuman ket saan nga immasideg iti PCG vessels iti sadinuman nga iligal a maok-okopar a maritime features ti China idiay WPS, malaksid nu pattien ti senador a paset iti teritoryo ti China iti Bajo de Masinloc, Escoda Shoal, Ayungin Shoal ken Pag-asa Island.
