BR LA UNION – Inawat ni retired Supreme Court Associate Antonio Carpio iti diaya ti Philippine Bar Association nga i-host iti public debate kontra kenni Senador Rodante Marcoleta, tapno mailinteg ti mapapati a biddut a waragawagna mainaig iti West Philippine Sea.
Segun kenni Carpio, napateg a mailinteg ti kinuna ni Marcoleta tapno saan a maiyaw-awan ti publiko.
Kinunana a ti debate ket sakopen dagiti isyu a dinakamat ni Marcoleta, agraman ti legalidad ti West Philippine Sea ken makatulong daytoy tapno ma-edukaran ti publiko.
Kabayatanna, dinakamat ni Carpio iti pangta ni Marcoleta nga idarum na ti treason.
Inlawlawagna a maiyannurot iti linteg, mapasamak laeng ti panangliput wenno treason iti panawen ti gubat ken saan nga iti panawen ti kapya, ket sakbay a mapasamak daytoy, kasapulan a mabaliwan ti Revised Penal Code ken ti Konstitusyon.
Segun kenni Carpio, kasapolan a suruten ti pagilian iti international law, kabilang iti United Nations Convention on the Law of the Sea, a mangitudtuding ti territorial sea ti agingga 12 nautical miles laeng.
