Nainget a banbantayan ken namin-anu a daras a nagradyo ti Philippine Coast Guard (PCG) Islander aircraft iti nasaripatpatan a Chinese vessel nga “ZHONG SHAN DA XUE” ti kaadayo a 78.21 nautical miles ti Amianan-a-daya ti Itbayat, Batanes itay alas otso ti bigat, ladwa ti Martes, Abril 15.
Impadamag ni PCG spokesperson for the West Philippine Sea Commodore Jay Tarriela nga impadeploy ni PCG Commandant Admiral Ronnie Gil Gavan ti PCG Islander 4177 idiay Batanes tapno i-monitor ti nasao nga Chinese research vessel.
Ginandat met dagiti crew ti PCG Islander a mangipadanon ti radio communication iti barko ngem awan pulos iti sungbat da.
Impaganetget dagiti PCG aviators iti radio challenge da ti Chinese research vessel ti kaawan otoridad da a mangisayangkat ti marine scientific research iti uneg ti exclusive economic zone (EEZ) ti Pilipinas.
Impunto na pay a dagiti aktibidad ti barko ti China ket nalawag a panaglabsing ti United Nations Convention on the Law of the Sea (UNCLOS) ken Philippine Maritime Zones Act.
