BR LA UNION – Naka-heightened alert ti Coast Guard District North Western Luzon gapu iti pangta ti Super Typhoon Inday.
Iti pannakiuman ti Bombo Radyo La Union kenni Lieutenant Junior Grade Dado M. Ab-Abulon Jr., Officer-in-Charge (OIC) for the Community Relations Office iti Coast Guard District North Western Luzon ditoy San Fernando City, La Union, kinunana a nakaalerto amin nga istasyon ken sub-stations da tapno masigurado ti napardas a panangresponde iti panawen ti emerhensiya a gapwanan ti napigsa a bagyo.
Kinunana pay nga adda 60 a response groups, buklen iti 400 a kameng ti Philippine Coast Guard–North Western Luzon, a nakasagana para iti dagus a deployment.
Nakasagana metten dagiti 10 a land assets ken 28 a floating assets para iti search and rescue operations, maritime patrol ken evacuation support.
Nainget pay ti panangmonitor kadagiti pantalan, karayan ken dadduma pay a bodies of water iti intero a rehiyon.
Pinalagipan ti Coast Guard dagiti umili, nangruna kadagiti mangngalap a saanda pay laeng nga aglayag wenno tumapog iti kabaybayan tapno maliklikan ti pannakaisagmak bayat ti panagduprak ti bagyo Inday.
Aktibo met ti pannakikoordinar ti ahensiya kadagiti LGU ken dadduma pay a maseknan nga ahensiya ti gobyerno tapno napardas ken naurnos ti panagresponde iti aniaman a sitwasyon.
