Nangiruar ti P133.09 million nga ayuda iti Department of Agriculture (DA) para kadagiti mannalon a naapektaran ti Severe Tropical Storm Crising wenno Wipha nga adda itan iti ruar ti pagilian ken iti agraraira a Southwest Monsoon wenno habagat.
Paset kadagiti ipaay ti ahensya ket dagiti bukel ti palay, mais, ken gulay manipud kadagiti regional offices ti Central Luzon, MIMAROPA, Central Visayas, Zamboanga Peninsula, Soccsksargen, ken Caraga.
Aktibo metten iti Quick Response Fund para iti rehabilitasyon dagiti apektado a lugar.
Malaksid kadagitoy ket mabalin pay nga umutang dagiti mannalon ti agingana P25,000 iti sidong ti Survival and Recovery Loan Program ti Agricultural Credit Policy Council, awan ti interest na ken mabayadan ti agingana tallo a tawen.
Makaawat met dagiti addaan ti crop insurance ti bayad-danyos manipud iti Philippine Crop Insurance Corporation.
Malaksid iti inisyal a report ti ahensya, dumanon iti P96.9 million iti perdisyon kadagiti mula, dingwen, ken manok partikular iti Ilocos Region, Cagayan Valley, Central Luzon, Calabarzon, MIMAROPA, ken Western Visayas.
Nasurok met a 4,600 dagiti mannalon iti maap-apektaran ken nasurok 2,200 metric tons iti nailista a production loss iti 6,037 nga ektarya ti talon.
Kabayatanna, agtultuloy iti field validation, price monitoring, ken koordinasyon ti DA kadagiti LGU tapno masigurado iti agtutuloy a suporta para kadagiti mannalon.#
