LA UNION – Nakasaganan dagiti mannalon ditoy Ilocos Region para iti umadani a panagmumula ita a tawen 2026.
Segun kenni Analiza R. Ramos, Chief, Field Operations Division ti Department of Agriculture – Regional Field Office 1, iti umuna a quarter paylaeng ket sinaganaanen ti ahensya ti posible a problema dagiti mannalon ditoy rehiyon nga igubuay ti climate change ken El Niño phenomenon.
Nangiyuswat ti ahensya kadagiti nagduduma nga addang tapno masiguro nga agtultuloy ti produksyon iti sektor ti agrikultura.
Babaen kadagiti banner programs da, agtultuloy ti panangibunong kadagiti early maturing varieties ti pagay ken mais kasta met kadagiti vegetable seeds, pakairamanan dagiti hybrid seeds ken dadduma pay a klase ti mula a maibagay ti lugar nga agkurkurang ti suplay ti danom.
Tarigagay daitoy a maliklikan ti epekto iti kinakurang ti padanom ken masigurado a naannayas ken produktibo ti agbalin nga apit.
Kabayatan ti panagsagana para ti cropping season, naipaganetget a ti Ilocos Region ket maysa a rice-based area.
Iti agdama ket sibubukel a nasurok 400k nga ektarya a talon iti maikkan ken amin ket mamulaan kadagiti hybrid ken certified seeds.
Impagpannakkel ni Ramos nga inton umay a wet cropping season ket awan ti mabati a mannalon ken amin ket maikkan kadagiti kasapulan da a bin-i.
Kabayatanna, para met kadagiti lugar nga adda ti umdas na a padanom ket agtultuloy latta iti distribusyon babaen iti Philippine Rice Research Institute wenno DA-PhilRice.
Pammaneknek laeng daitoy iti nasinged a suporta ti gobierno iti sektor ti agrikultura, nangruna iti pagsyaatan ti tunggal mannalon.
