Imbutaktak ti Department of Justice a posible nga adda pay dagiti bangkay iti maipagarop a naibelleng iti dadduma a paset ti Taal Lake a konektado iti sabali a kaso, malaksid kadagiti mapukpukaw a sabungero.
Segun kenni Justice Secretary Jesus Crispin Remulla, adda ti impormasyon a kitkitaen da ita a mangibagbaga a sumagmamano kadagitoy a bangkay ket mabalin a karaman iti ‘war on drugs’.
Malaksid iti ground zero ti maisaysayangkat a ‘search and retrieval operations’ idiay Taal Lake, kenuna ti sekretaryo nga adda pay ti sabali a fish pond iti maitudtudo a nakaibellengan dagiti bangkay a rumbeng nga imbestigaran da.
Kabayatanna, imbinglay pay ni Justice Secretary Remulla nga imbilin nan iti panakaikali dagiti sumagmamano a bangkay idiay Batangas tapno maipasidong ti panagamiris wenno eksaminasyon.
Dagiti nasao a bangkay ket nadiskubre pay laeng idi 2020 ken awan ti pamilya wenno kabagyan iti nangala.
Tarigagay ti ahensya a lawlawagan dagiti dadduma pay a kaso ti ‘disappearances’ karaman dagiti tallo a bangkay nga maipakpakalin, a posible a mainaig iti napasamak a ‘war on drugs’ ti napalabas nga administrasyon.
Impasigurado ti sekretaryo nga agtaltalinaed da a nakapamaysa iti imbestigasyon seknan dagiti mapukpukaw a sabungero bayat nga maipapaayan importansya iti nadiskubre da a posibilidad ti koneksion iti ‘war on drugs’.#
