LA UNION – Namnamaen ti baro a dagdag-bawas iti presyo dagiti produkto a petrolyo iti sumaruno a lawas.
Segun iti Department of Energy-Oil Industry Management Bureau (DOE-OIMB), namnamaen a ngumato ti P0.10 agingga P0.30 kada litro ti gasolina.
Iti diesel ket namnamaen nga agkissay ti presyo manipud P0.40 agingga P0.70 kada litro bayat a ti kerosene ket namnamaen a bumaba iti P0.40 to P0.60 kada litro.
Iti estimated price ket maibasar iti resulta ti uppat nga aldaw a trading iti global oil market.
Mabalin nga agbaliw pay ti nasao a kantidad babaen iti anunsiyo dagiti oil companies inton Lunes ket masansan a maipatungpal iti kabigatanna, aldaw ti Martes.
Iti mixed price adjustment ket adda pakainaiganna iti demand wenno pagkasapolan kadagiti nasao a produkto.
Malaksid dayta, apektado pay iti presyuan ti langis iti world market iti agtultuloy a riribok iti baetan ti Israel ken Hezbollah ken iti desisyon ti sumagmamano nga oil producing countries, a pawaywayan da ti tallo a bulan wenno agingga Marso 2025, iti panagkissay da ti supply ti krudo tapno maliklikan iti kellaat a panagbaba ti presyo iti sangalubongan a merkado.
