LA UNION – Nairut a tungpalen dagiti employer iti baro a minimum wage kalpasan nga aprubaran ti NCR Wage Board iti P35 a kanayunan a suweldo para kadagiti mangmangged iti pribado a sektor iti nasao a rehiyon.
Segun iti kadackelan a business group ditoy pagilian nga Philippine Chamber of Commerce and Industry (PCCI), ires-respeto da iti nagbalin a desisyon ti regional wage board ken nagkari dagitoy a suruten da iti baro a daily minimum wage a P645 manipud P610.
Impaganetget pay ti grupo a resonable iti baro a wage hike kumpara iti gakat a P100 a dackel unay para kadagiti employer ket possible nga agbanag daytoy iti panag-rikep dagiti negosyo ken pannaka-pukaw ti trabaho dagiti mangmangged.
Napateg kunana nga ikonsidera iti epekto ti panagngato iti minimum wage kadagiti negosyo a mapilitan nga ag-adjust iti mas nangat-ngato a labor costs partikular para kadagiti micro, small and medium enterprises (MSMEs).
Mamati pay iti grupo a maysa daytoy a win-win decision para kadagiti employer ken mangmangged.
Kabayatanna, imbaga ti grupo a bantayan ken amirisen da iti epekto na kadagiti babassit a Negosyo, nga ibilbilang da a backbone ti ekonomiya ti pagilian.
