BR LA UNION – Nainget nga imballaag ni Philippine National Police (PNP) chief Gen. Rommel Francisco Marbil a sumango ti kaso iti siasinuman nga aktibo a pulis nga agbalin a ‘partisan’ ita nga eleksiyon.
Kasaruno daytoy iti panangipeksa ti suporta dagiti retirado a PNP Academy alumni kenni Vice President Sara Duterte a sumangsango ti impeachment.
Kinuna ni Marbil a saan a mabalin a suportaran ti PNP iti siasinumana kandidato agsipudta adda sinapataan da a pagrebbengan nga agserbi iti publiko.
Iti siasinuman nga aktibo a PNP member a mapaneknekan a karaman iti partisan political activities ket mapaatawan ti pannusa agingga a maikkat iti trabaho.
Maipalagip nga inwaragawag ti PNP Class of 1991 a suportado da ni VP Sara Duterte.
