LA UNION – Umaboten iti 30 a lugar iti apektado ti ashfall wenno dapo manipud iti bimtak a bulkan Kanlaon idiay Negros Island maibasar iti datos ti Department of Environment and Natural Resources (DENR).
Segun iti DENR- Environmental Management Bureau (EMB) Western Visayas, nailista ti ashfall idiay Negros Occidental partikular idiay La Castellana, La Carlota City, Bago City, Murcia, Pontevedra, San Enrique, Hinigaran, Valladolid, Pulupandan ken Moises Padilla.
Apektado pay dagiti lugar idiay Guimaras partikular idiay Nueva Valencia, Sibunag, San Lorenzo ken Jordan.
Kasta metten idiay Iloilo, nangruna idiay Iloilo City, Pavia, Oton, Tigbauan, Igbaras, Guimbal, Miag-ao, ken San Joaquin ken 7 pay a lugar idiay Antique.
Mainaig ti daytoy, nagballaag iti EMB Western Visayas kadagiti apektado a residente a mabalin nga agresulta iti respiratory problems iti pannakaisarang iti ashfall kas iti iritasyon iti mata, kudil ken injury.
Nasken a limitaran dagiti outdoor activities partikular dagiti ubbing, nataengan ken addaan ti respiratory issues.
Naabiswan dagiti apektado a residente nga agsuot ti N95 mask ken googles nu kasapolan a talaga ti rumwar ken agsuot ti atiddog ti manggas na kas proteksiyon iti kudil.
