BR LA UNION – Nagballaag ti maysa a journalist idiay Davao City a mangidatag ti kaso kabilang iti cyberlibel ken copyright infringement kontra iti maysa a prosecutor ti International Criminal Court (ICC), nu saan a mangirwar ti public apology seknan iti maipagarop a tampered video.
Iti Affidavit of Denial a napetsaan ti Pebrero 26, kinondenar ni Ben Jason Tesiorna iti imprisinta ni ICC Prosecutor Julian Nicholls iti maysa a CCTV video kabayatan ti 2nd day ti Confirmation of Charges kontra kenni sigud a President Rodrigo Duterte.
Impaganetget ni Tesiorna, isuna ti nangala ti nasao a video idi Disyembre 19, 2013 iti maysa a media showcase ti Central 911 idiay Davao City, ken awan ti pammalubos na tapno i-broadcast daytoy.
Inakusaran ti journalist ni Nicholls ti misrepresentation ken illegal tampering agsipudta nakabilan ti English subtitles iti video tapno parwaren a konektado daytoy iti extra-judicial killing (EJK).
Inlawlawag ni Tesiorna a ti naipakita nga insidente iti CCTV ket playback laeng ti napalabas a krimen ken saan a napasamak iti real-time, isunga awan ti nagresponde nga opisyal a nagbuya iti dayta a gundaway.
Binilin na iti ICC Pre Trial I nga ibaga iti ICC Prosecutor a mang isyu ti public apology gapu iti maipagarop a misrepresentation ken ikkaten ti nasao a video iti court registry wenno records.
Impaayan ni Tesiorna iti ICC prosecutor ti agingga Biyernes, Pebrero 27, tapno mangirwar ti Public Apology sakbay nga ituloy na ti pangta a reklamo.
