BR LA UNION – Umaboten iti innem ti bilang dagiti natay gapu iti panagduprak ti bagyo Crising ken Habagat ditoy pagilian a nanggubway ti napigsa a tudo ken nakaru a panaglayos.
Maibasar iti report manipud National Disaster Risk Reduction and Management Council (NDRRMC), tallo ti nailista a natay idiay Northern Mindanao ken saggaysa idiay MIMAROPA, Davao Region ken Caraga.
Nupay kasta, dua pay laeng kadagiti innem a naipadamag a natay iti panagduprak ti bagyo ken habagat iti kumpirmado.
Nabigbig ti maysa a biktima a taga-Barangay Población, Mambajao, Camiguin a natupakan ti kayo idi Hulyo 19. Naitaray iti ospital ngem naideklara a natay gapu iti sinagrap na a trauma secondary to external injury.
Maysa pay a biktima ket taga-Barangay Matin-ao, Mainit, Surigao del Norte, a natupakan met laeng ti na-buwal a kayo bayat a nakalugan ti motorsiklo.
Segun iti ahensiya, lima metten ti naipadamag a nasugatan idinto nga innem pay ti naireport a mapukpukaw.
Agingga ita, nasurok a 1.2 milyon nga indibidual wenno nasurok 300,000 a pamilya ti naapektaran iti panagduprak ti Bagyo Crising, southwest monsoon ken low-pressure area (LPA) iti amin a rehiyon ti pagilian malaksid idiay Eastern Visayas.
Dagiti apektado a lugar ket nakailista ti panaglayos, panagregga-ay ti daga, pannakadadael dagiti istruktura ken adda pay tornado a napasaran ti sumagmamano a lugar ditoy pagilian.
