LA UNION – Umabot ti 13 a tattao iti naipadamag a natay gaputi panagduprak ti bagyo Enteng.
Segun kenni Office of the Civil Defense spokesperson Edgar Posadas, madama iti beripikasyon kadagiti naipadamag a natay a pakaibilangan dagiti 8 manipud probinsiya ti Rizal partikular idiay Antipolo City kasaruno dagiti insidente ti landslide ken layos, 3 idiay Bicol ken 2 idiay probinsiya ti Cebu a natupakan ti pader.
Nakailista pay ti OCD iti 10 a tattao a nasugatan idiay Cebu gaputi epekto ti bagyo.
Kabayatanna, base iti datos iti NDRRMC, umaboten iti pakabuklan a 147,024 indibidwal wenno kaibatugan ti 37,867 a pamilya manipud iti nasurok 300 a barangay idiay Central Luzon, Calabarzon, Bicol, Western Visayas, Central Visayas, ken National Capital Region.
Aganay 157 a lugar iti nailista ti ahensiya a nalayos, 4 iti nailista nga insidente ti landslide gapu iti panagtudtudo ken tallo iti narsuod nga istruktura.
Adda met ti pakabuklan a 54 a kalsada ken dua a rangtay iti agtaltalinaed a saan pay a madalyasatan.
Aganay 11 a siyudad ken ili iti Central Luzon, Calabarzon ken Bicol iti napukawan ti suplay ti kuryente.
Iti advisory manipud Meralco ita nga aldaw ti Martes, kimmiddaw ti pannakaawat iti kompaniya agsipudta 2,000 a customer da iti agtaltalinaed a layos.
Nupay kasta, siniguro da a maisubli iti suplay ti kuryente iti amin nga apektado a customers iti kabiitan a panawen.
Namnamaen nga inton bigat ti Miyerkules a rumwar iti Philippine area of responsibility iti bagyo Enteng.
