BR LA UNION – Umaboten ti 140 a tattao ti nailista a natay bayat a 127 pay ti mapukpukaw ken 87 dagiti nadun-dunor kalpasan ti nalawa a panagduprak ti bagyo Tino ditoy pagilian.
Immunan a kinumpirma ti National Disaster Risk Reduction and Management Council (NDRRMC) maibasar iti datos ita nga aldaw ti Huwebes, Nobyembre 6, umabot ti 114 a tattao ti naipadamag a natay ngem saan pay a karaman ditoy dagiti baro a 28 a nailista idiay Cebu, a kangrunaan a dinuprak a probinsiya ti bagyo Tino.
Iti datos ti ahensiya, immuna a naipadamag a 71 dagiti natay idiay Cebu.
Iti Cebu ti maikadwa a lugar a nagdiswan ti bagyo Tino ket nakapadas ti saan a ninamnama a napegges nga ayos ti layos kadagiti ili ken siyudad, nakaiyanudan iti adu a behikulo ken arigna nalned iti adalem a layos dagiti babbalay.
Ti dadduma pay a lugar a nakailista ti casualty ket idiay Negros Occidental, Negros Oriental, Agusan del Sur, Southern Leyte, Antique, Bohol, Capiz, Iloilo ken Leyte.
Kabilang iti nasao a bilang dagiti casualty dagiti innem a crew members ti military helicopter a nagsuwek bayat nga adda iti relief mission kadagiti dinuprak ti bagyo.
Ti bagyo Tino iti maika-20 a bagyo a simrek iti pagilian ken maysa kadagiti kapigsaan a dimmuprak ita a tawen.
Segun iti national weather bureau, adda pay dua agingga lima a bagyo ti namnamaen agingga agtapos ti bulan ti Disyembre.
Iti sabali a bangir, ti bagyo Tino nga itan ket maawagan a KALMAEGI ket posible nga ag-landfall idiay central Vietnam inton rabii.
Dagus a pinakdaaran ni Deputy Prime Minister Tran Hong Ha dagiti lokal nga opisyal nga ibilang ti nasao a bagyo kas “urgent and dangerous”, ken inawaganna pay a very abnormal” storm.
