Mangikabil ti Department of Agriculture kadagiti checkpoint iti nadumaduma a paset ti Luzon tapno ad-adda a malapdan ti panagwaras ti African Swine Fever (ASF), kalpasan ti kumarkaro a kasasaad daitoy a sakit idiay Batangas.
Segun kenni Agriculture Secretary Francisco Tiu Laurel Jr., nasken a kontrolen ti karne ti baboy ken produkto ti baboy tapno malapdan ti panagruar dagitoy manipud iti probinsia ti Batangas.
Kinunana a nasken pay a malapdan ti posible a iseserrek ti kontaminado a karne kadagiti lugar a dati a nadalusanen manipud iti epekto ti ASF.
Impasingked ti sekretario a dagiti eksperto manipud kadagiti lokal nga opisina ti DA ti mangbantay iti daytoy kakadua dagiti polis ken uray ti pannakabagi ti militar.
Kinunana a temporario laeng dagiti checkpoint bayat ti pgkontrol ti kasasaad idiay Batangas ken dadduma pay a lugar a makitkitaan ti panagadu ti kaso.
Nakalinya metten dagiti kanayonan nga addang tapno masigurado ti kinatalged dagiti baboy iti dadduma pay a lugar a saan a naapektaran ti ASF.
