Inawagan ti grupo dagiti mangisursuro a Teachers’ Dignity Coalition ti Department of Education (DepEd) a mangipatungpal kadagiti remedyo kalpasan ti nababa unay a panagatender dagiti estudyante kalpasan ti holiday break.
Daitoy ket iti laksid ti awag dagiti mannursuro, estudiante, ken nagannak a mangiduron iti panagsubli ti klase inton Lunes, Enero 6, ket intuloy latta ti DepEd ti pannakairugi manen ti klase idi Huebes, Enero 2, 2025.
Nupay maawatan ti grupo ti rason ti DepEd iti daytoy agsipud ta ti SY 2024-2025 ket transition year tapno maisubli ti old school calendar ti eskuela wenno ti June to March cycle, kinunada a napateg latta a pagpanunotan daitoy a naimbag.
Inbinglay ti grupo dagiti retrato dagiti classrooms dagiti sumagmamano nga estudiante ken basar iti report a naawat ti grupo ket dimmanon laeng iti 50%, bayat a dagiti dadduma ket maysa, dua wenno tallo laeng ti simrek wenno awan a pulos ti estudiante a maikuyog iti panagsubli ti klase idi Enero 2.
Inpakaammo pay ti koalision a basar iti kapadasanda, kaykayat dagiti annak ken nagannak ti saan a sumrek kalpasan ti selebrasion ti Baro a Tawen, nangruna no alanganinen ti aldaw.
Dayta ti gapuna a kinunada nga adu kadagiti estudiante ti mapan laeng ageskuela inton sumarsaruno a Lunes, isu a dandani awan ti simrek ti klase nabati nga aldaw ti panageskuela ita a lawas, Enero 2 ken 3.
Tapno maliklikan daytoy a kasasaad kadagiti sumarsaruno a tawen, inawagan ti grupo dagiti mangisursuro iti DepEd a mangituding manen kadagiti buffer days kadagiti sumaruno a tawen ti panageskuela kasta met ti kaadda ti academic health break saan laeng a para kadagiti estudiante no di ket agraman dagiti mannursuro.
