BR LA UNION – Mangdutok ti Department of Education (DepEd) ti 15,000 nga school principal tapno mapullatan dagiti bakante a posisyon kadagiti public schools ditoy pagilian.
Iti maysa a waragawag, kinuna ti ahensya a ti commitment nga agdeploy iti kuwalipikado a mangisursuro ket kas sungbat iti panagkurang dagiti principal iti pampubliko a pagadalan.
Maipalagip a maibasar iti year 2 report ti second congressional commission on Education (EDCOM II), dinakamat ti DepEd a 55% kadagiti pampubliko a pagadalan ditoy Pilipinas ket awanan ti principal a gapwanan ti sumagmamano a rason, kas iti nababa a passing rate iti National Qualifying Examination for School Heads (NQESH), nangato a turnover dagiti empleyado, kinakurang dagiti kwalipikado a kandidato, narigat a proseso, ken kaawan ti naurnos a mentoring, coaching, ken formal nga induction programs para kadagiti principal.
Tapno masungbatan dagiti nasao a karit, imbaga ti DepEd ti maysa nga addang a rugyan da ti ag-deploy ita a tawen 2025.
Kabayatanna, ag-isyu pay ti ahensya iti interim guidelines tapno masiguro a dagiti principal a nadutukan kadagiti opisina ket makasubli da iti nakaidestinuan da a pagadalan tapno maakem iti pagrebbengan da.
