BR LA UNION – Inlawlawag manen ti Department of Education Region 1 ti sumagmamano a napateg nga allagaden iti panangisayangkat ti seremonya iti panagturpos dagiti estudyante para iti School Year 2025–2026.
Daytoy ket babaen iti naisayangkat a press conference idi kalman, Marso 17, 2026 iti Executive Conference Hall ti DEPED Regional Office 1.
Inlawlawag ni Assistant Regional Director Rhoda T. Razon, a saan nga ipalubos ti ahensiya iti anyaman a pilit a panagkolekta ti kontribusyon kadagiti estudyante, kas maiyannurot iti “No Collection Policy” iti amin a public elementary ken secondary schools.
Kagiddan daytoy, inallokoy na dagiti pagadalan nga aramiden a simple ngem kalalagip iti graduation rites.
Nupay kasta, aminado ni Razon nga adda dagiti gundaway a maipalubos ti boluntaryo a panangipaay ti kontribusyon nangruna iti panawen ti panagturpos dagiti estudyante, para iti serbisyo a saan a kabaelan ti eskuwelaan a gastusan, kas iti graduation pictorial ken panagusar ti toga.
Kinunana a nu adda dagiti opisyal wenno staff ti pagadalan a maduktalan nga agar-aramid ti iti forced collection, mabalin a mabalin a sumango dagitoy iti maitutop nga administrative sanctions.
Mainaig ti daytoy, inlawlawag met ni Project Development Officer IV Darius Nieto ti DEPED Region 1, a ti kangrunaan a pangalaan ti gastosen para iti end-of-school-year rites ket iti Maintenance and Other Operating Expenses (MOOE) dagiti pagadalan.
Ngem nu saan nga umanay ti pondo, mabalin nga awaten dagiti boluntaryo a kontribusyon nga aggapo kadagiti nagannak, maibasar iti agdama a polisiya ti DepEd.
