Pinalawa pay ti Department of Education (DepEd) dagiti serbisyo pangsalun-at, panunot, ken anti-bullying kadagiti pampubliko a pagadalan babaen ti Kaagapay Program a nairanta a kumadwa kadagiti nagannak dagiti estudyante.
Maibasar iti DepEd Memorandum No. 002, s. 2026, maibilang dagiti nagannak kas co-educators a tumultulong a mangpapigsa ti values formation, positive discipline, ken learner well-being iti pagtaengan a kas suporta kadagiti programa ti pagadalan.
Segun kenni Education Secretary Sonny Angara, mapappapigsa ti suporta kadagiti estudyante nu agkakadwa nga agtignay iti agpada a pamilya ken pagadalan ti panangsukog ti ugali ken panangipaay ti pammagbaga ti aniaman a problema dagiti agtutubo.
Aganay P100M ti naitukon para ti pannakaipatungpal ti programa ti intero a pagilian, karamanen ti parent engagement sessions ken advocacy campaigns tapno maibanag ti polisiya dagiti pagadalan iti praktikal nga implementasyon iti uneg ti pamilya.
Kasaruno ti Kaagapay Program, maipatungpal pay ti P2.9B a School-Based Mental Health Program a maibasar met ti Republic Act No. 12080, a nakapamaysa met ti mental health services ken suicide prevention.
Babaen ti Kaagapay, ket impasigurado ti DepEd a dagiti nagannak ket san laeng a guardians nu di ket aktibo a makadwa iti panangaramid ti natalged, suportado, ken inklusibo nga aglawlaw para kadagiti estudyante.
