Nakatuding nga irepaso ti Department of Education (DepEd) ti implementing rules and regulations (IRR) ti Anti-Bullying Act of 2013 para iti naing-inget a kampaniya kontra dagiti insidente ti bullying.
Kinuna ni DepEd Sec. Sonny Angara a ti nadakamat a linteg ket saan pay a naan-anay a naipatungpal ti amin a pampubliko a pagadalan ti intero a pagilian.
Mainaig iti daitoy ket nakatuding a makitinnulong ti ahensiya iti Second Congressional on Education (EDCOM II) para iti panagrepaso ti IRR a manamnama a makumpleto sakbay a mangrugi ti academic year 2025-2026.
Panggep pay ti panagadal ti IRR a masiguro nga maiyannurot daitoy ti agdama a linteg.
Kinuna ti sekretaryo a prayoridadda ti makaited ti kanayunan nga guidance counselor positions tapno masiguro ti naan-anay a tulong iti panagsungbat kadagiti pasamak nga adda pakainaigan na iti bullying.
