LA UNION – Pabor iti Department of Information and Communications Technology nga i-regulate iti panagusar ti Social media platform a TikTok ditoy Pilipinas.
Daytoy ti inwaragawag ni DICT Undersecretary Jeffrey Dy kasaruno ti naidatag a gakat idiay Kamara de Representantes nga ipawil metten ditoy pagilian dagiti foreign adversary-controlled applications kas ti TikTok.
Inlawlawag ti opisyal, dagiti nasao a klase ti social media applications ket posible nga usaren iti espionage wenno panag-ispiya, isunga kasapolan nga i-regulate iti panagusar daytoy.
Malaksid dayta, inwaragawag pay ni Dy nga iti agdama, nainget a ban-bantayan da iti messaging app a Telegram kalpasan ti sumagmamano a report a maus-usar met daytoy para iti panagi-leak ti database information manipud kadagiti website ti gobyerno a biktima ti hacking.
Bayat a ti Facebook ket us-usaren metten dagiti dakes nga elemento para iti online selling dagiti maladaga.
Kabayatanna, umap-apela ita ti DICT kadagiti nasao a social media platforms a siguradwen a saan a mausar ken maaramat dagitoy iti ilegal nga aramid.
