BR LA UNION – Impaganetget ni Atty. Joel Butuyan, maysa nga ICC-accredited lawyer, nga awan kinapudno na iti agwar-waras nga impormasyon seknan iti maipagarop a panang-aprubar ti interim release ni sigud a President Rodrigo Duterte.
Iti interview ti Bombo Radyo, impaganetget ni Butuyan nga inggagara ti kampo dagiti Duterte supporters a tikawen ti publiko babaen ti biddut nga impormasyon.
Naigiddan pay iti panagwaras ti damag iti waragawag ni Nicholas Kaufman seknan iti maipagarop a saan a nasayaat a kasasaad ti salun-at ni Duterte.
Para iti kampo dagiti biktima, napateg a dumalan iti umno a beripikasyon ti anyaman a waragawag manipud iti kampo ni Duterte.
Kagiddan daytoy, nagpanawagan da a suruten dagiti intuding a kondisyon ti International Criminal Court.
Agtultuloy ti panawagan para iti kinapudno ken hustisya iti tengnga dagiti isyu nga adda pakainaiganna iti karbengan pantao.
