BR LA UNION – Im-imbestigaranen ti Department of Migrant Workers (DMW) iti kwestionable a panaggatang ti daga nga aggatad ti P1.4 billion nga awanan ti panag-aproba manipud iti Overseas Workers Welfare Administration (OWWA) board.
Iti maysa a press conference idi kalman, kinumpirma ni OWWA Administrator Patricia Caunan iti maisaysayangkat nga imbestigasyon, siniguro na nga agpannuray iti due process, ket karaman a maim-imbestigaran iti sinukatan na a ni sigud nga OWWA Administrator Arnell Ignacio.
Segun iti baro nga OWWA administrator, iti ginatang a daga ket pangipasdekan kuma ti halfway house wenno dormitory-type accommodation para kadagiti overseas Filipino workers (OFWs).
Impasugurado met ti opisyal, kas baro nga administrator ti ahensiya, mangisayangkat da ti maiyanatop nga audit, kiddawen da met iti legal opinion manipud iti Department of Justice ken makitinnulong iti Commission on Audit (COA).
Impaganetget ti opisyal, a ti kaha ti pagilian ken dagiti overseas Filipino workers ket sagrado isunga seryoso da iti ar-aramiden nga imbestigasyon.
Agtaltalinaed met nga intact iti trust fund ti migrant workers ket posible a naala iti pondo ti ahensiya a pinaggatang ti daga.
Innayon na pay, ado dagiti tao nga maim-imbestigaran ken nakatutok ditoy ni Migrant Workers Sec. Hans Leo Cacdac manipud pay idi napalabas a tawen kas agsirsirbi a chairman ti OWWA board.
Maipalagip nga naikkat iti pwesto ni sigud nga OWWA Adm. Ignacio kalpasan nga maibutaktak iti kotrobersiyal a panaggatang ti bilyon a gatad ti daga a saan a dimmalan iti OWWA board.
Immuna met nga inlawlawag ni Sec. Cacdac a kasapulan ti approval manipud iti board para kadagiti amin a katulagan a serrekan ti OWWA.
