Impasiguro ti Department of Migrant Workers (DMW) ti sibubukel a suporta para kadagiti Overseas Filipino Workers (OFWs) a sumangsango kadagiti kaso kriminal wenno pannakaarestar ti sabali a pagilian, pakairamananen ti legal ken welfare assistance babaen ti AKSYON Fund.
Segun kenni DMW Secretary Hans Leo Cacdac, maiyannurot iti direktiba ni Presidente Ferdinand Marcos Junior a nakasagana iti gobierno a sumungbat kadagiti aniaman a sitwasyon dagiti OFWs nangruna nu maipanggep daitoy iti panaglabsing iti linteg.
Karaman iti tulong ti panangipaay iti abogado, jail visits, ken dadduma pay a suporta tapno mapagtalinaed a natalged ti kasasaad dagiti OFW kabayatan ti kaadda da iti kustodiya.
Imbida pay ti sekretaryo iti balligi ti administrasyon iti pannakadismiss ti kaso kontra kadagiti 17 OFWs a naibalud idiay Qatar gapo iti illegal assembly.
Iti nagbalin a panagdengngeg idi Abril 10, nangipeksa ti panagdanag ni Senador Imee Marcos mainaig iti proteksyon dagiti OFWs iti sangsangwen da a kaso kriminal mainaig iti pannakaarestar kenni sigud a Presidente Rodrigo Duterte.
Kanayunan iti AKSYON Fund para ti Legal Assistance Fund (LAF) a naibangon babaen ti RA 8042 wenno Migrant Workers Act ken panggep a siguraduen nga adda umdas a suporta legal dagiti OFWs iti panawen ti krisis.
Segun pay kenni Cacdac, iti agdama ket adda nasurok 1,198 a kaso dagiti OFW ti tultulongan dagiti abogado ti DMW.
Kadagiti dadduma a pagilian, adda metten ti katulagan a mangipalubos kadagiti sentensyado a mapaawid ditoy Pilipinas tapno ditoy a pagdusaan ti nagbasolan da.
Kinuna ti opisyal a kanayon a nakabantay ti gobierno ken ti Presidente tapno ipasiguro a saan a mabaybay-an dagiti OFWs nangruna kadagiti panawen iti nangato a pagkasapulan da iti tulong.
