Ipamaysa ti Department of Migrant Workers (DMW) iti panangbirok iti hustisia para iti Overseas Filipino Worker (OFW) a ni Jenny Alvarado, a mapapati a natay gapu iti suffocation idiay Kuwait.
Dinakamat ni Migrant Workers Secretary Hans Leo Cacdac nga aramiden ti DMW dagiti addang maibasar kadagiti legal a prinsipio ken sientipiko nga ebidensia nga adda iti ahensia, partikular ti resulta ti autopsy ni Alvarado nga insayangkat ti National Bureau of Investigation (NBI).
Kinunana a makatulong daytoy tapno maammuan ti pudno a rason ti pannakatayna ken maammuan no adda ti kinaliway manipud iti amo na.
Pasingkedan pay ti imbestigasion no umiso ti panangtrato ti amo ni Alvarado kenkuana, nangruna ket panawen ti winter ita sadiay Kuwait, a mabalin a makagapo ti impatay na.
Dinakamat pay ni Cacdac nga ituloyda ti kaso segun ibasar da amin ti legal a proseso ken resulta ti imbestigasion.
Nabiit pay a simmarungkar ni Secretary Cacdac iti lamay ni Alvarado sadiay Rodriguez, Rizal tapno mangted iti update iti pamiliana maipapan iti agtultuloy nga imbestigasion ken mangted iti pinansial a suporta manipud iti gobierno.
Impasigurado pay ti ahensia ti agtultuloy a suporta para kadagiti lima nga annak ni Alvarado, partikular iti panagadal da babaen ti pannakitinnulong ti Overseas Workers Welfare Administration (OWWA).
Kabayatanna, iti isyu ti saan nga umiso a panangtaming ti bangkay ni Alvarado, binilin ni Cacdac dagiti abogadoda idiay Kuwait nga imbestigaren ti service provider a responsable iti biddut ken nagkiddaw iti posible a kompensasion.
Nakatuding a mangangay ti Senado iti hearing maipapan iti kaso ni Alvarado inton Martes, Enero 21, nu sadiay ket dar-ayan daitoy ni Cacdac ken dagiti opisial ti DMW ken OWWA agraman dagiti pannakabagi manipud NBI tapno mangipaay iti updates ti imbestigasion.
