BR LA UNION – Nainget a binilin ti Department of Energy (DOE) iti amin nga oil companies ken gasoline stations a sumurot iti maipat-patungpal a fuel pricing rules tapno maliklikan iti hoarding ken anya pay a saan nga awtorisado a panagngato ti presyo ti petrolyo iti tengnga ti mapad-padaanan a panagngato ti oil price gaputi epekto ti riribok idiay Middle East.
Daytoy ket maiyannurot iti direktiba ni Presidente Ferdinand R. Marcos Jr., nga irutan ti monitoring iti tulong ti Department of the Interior and Local Government ken Philippine National Police.
Segun iti DOE, agtultuloy a bantayan da iti garaw ti presyo kadagiti gasolinaan tapno masiguro a saan a maabuso dagiti motorista ken konsyumer.
Kabayatanna, dagitoy ti agdama a pump price range dagiti produkto a petrolyo manipud Marso 6 agingga March 9:
Gasoline RON 97/100: ₱53.70 – ₱76.50/L
Gasoline RON 95: ₱50.00 – ₱71.04/L
Gasoline RON 91: ₱49.00 – ₱64.70/L
Diesel: ₱49.00 – ₱66.59/L
Diesel Plus: ₱56.80 – ₱74.81/L
Kerosene: ₱78.90 – ₱99.89/L
Palagip pay ti DOE a nainget a maipawil iti hoarding ken ilegal a panaglakwan ti petrolyo iti sidong ti Batas Pambansa Blg. 33 nga inamyendaran ti Presidential Decree 1865.
Siasinuman a manglabsing iti linteg ket mabalin a mapatawan ti maiyannatop a pannusa ken kanselasyon ti permit iti operasyon.
