Agtitinnulong itan ti Department of Health ken ti Department of Education iti Ilocos Region para iti pannakaipatungpal ti Bakuna Eskwela.
Panggep daytoy a programa ti panangbakuna iti agingga iti 165,000 nga estudiante manipud Grade 1 agingga Grade 7 kadagiti public schools iti rehion.
Inaramid ni Regional Director Paula Paz Sydiongco ti palawag iti maysa a press conference a naangay idi kalman ti Lunes.
Segun kenni Sydongco, umdasen ti bakuna para iti nadakamat a bilang dagiti estudiante.
Inlawlawag pay ti opisyal, ti Bakuna Eskwela ket maysa a school-based immunization program a panggep a salakniban dagiti agtutubo manipud kadagiti sakit.
Karaman kadagitoy ti kamuras, rubella, diphtheria, ken human papillomavirus.
Maitunos ti Bakuna Eskwela iti DOH National Immunization Program Department Memorandum No. 2024-250 wenno ti Interim Guidelines on the Resumption of School-Based Immunization (SBI) kalpasan ti Covid-19.
