Kinumpirmar ti Department of Justice nga addaan dan ti ‘ground zero’ a pakairugyan iti maisayangkat a ‘technical diving operation’ iti paset ti Taal Lake ken posible a mairugi daitoyen aniaman nga aldaw ita a lawas.
Segun kenni Justice Secretary Jesus Crispin Remulla, ammon ti ahensia iti lokasion nga imbinglay ken imbutaktak mismo ti iggem da a testigo.
Maibasar iti imbutaktak ti witness, daitoy ket maisa a ‘fishpond‘ a maipagarop a kukua ti maisa kadagiti suspek a karaman kadagiti maimimbestigaran.
Innayon pay ni Secretary Remulla, kompiyansa iti departamento iti impormasion nga iggem da isu ta masigurado da iti lokasyon a pakairugyan ti ‘technical diving operation’.
Dinakamat pay ti sekretaryo dagiti karit a sangwen ti technical diving team kas iti kondisyon ti lakebed ti Taal gapo kadagiti mailislista a volcanic eruptions, ken iti kasasaad ti panawen.
Nupay kasta, saan daytoy a rason tapno isardeng ken maitantan iti panakabirok dagiti mapukpukaw a sabungero.
Maipalagip nga imbutaktak ti testigo a ni alyas ‘Totoy’ wenno Julie ‘Dondon’ Patidongan iti rebelasyon a naitanem sadiay Taal Lake dagiti biktima, banag a taktakwaten ti DOJ iti kinapudno daytoy tapno maresolba ken naan-anayen a maamwan iti kinapudno. #
