BR LA UNION – Impasigurado ti Department of Justice a mangbukel da kadagiti nalalaing a piskal wenno prosecutors a mangi-depensa iti gobierno kontra iti consolidated habeas corpus nga inpila dagiti annak ni sigud a Presidente Rodrigo Roa Duterte idiay Korte Suprema.
Iti interview ita nga aldaw iti ‘Kapihan sa Manila Bay’, kinuna ni SOJ Jesus Crispin Remulla nga agsagsagana da para iti posibilidad nga oral argument seknan iti legalidad ti pannakatiliw ti sigud a presidente.
Daytoy a palawag ti sekretaryo kalpasan a nagkedked ti OSG a mangibagi iti gobierno a mangsungbat iti subpoena ti Korte Suprema mainaig iti petition for habeas corpus nga inpila dagiti agkabsat a Duterte.
Kinunana pay nga adda pammalubos iti inaramid da a panang-takeover ti OSG manipud kenni Executive Secretary Lucas Bersamin.
Mamati ni Remulla nga umdas ti kabaelan ti gobiyerno a mangidepensa iti Pilipinas iti takderna.
Kinunana a panawen metten tapno ipaganetget ti kinasiasinoda iti umili a Pilipino kas abogado dagiti umili ken ti republika.
Iti laksid ti nagbalin a desisyon ti OSG , inlawlawag ni Remulla nga awan iti conflict wenno susik da kenni Solicitor General Menardo Guevarra.
