Nangbukelen ti Special Investigation Team on New Cases (SITN) ti Department of Justice tapno idauloan ti imbestigasyon ti kaso ti pammapatay kenni Johnny Dayang, maysa a beterano a periodista wenno journalist ken sigud a Mayor ti Kalibo, Aklan.
Inwaragawag ti Department of Justice a nangidutok dan ti dua a piskal tapno idauloan ti imbestigasyon kakadwa dagiti dadduma pay nga imbestigador ti Philippine National Police, National Bureau of Investigation, ken dadduma pay nga ahensya.
Pinermaan payen ni Justice Secretary Jesus Crispin Remulla ti panag-issue ti Department Order tapno pormal a maidutok ti dua nga piskal kas leader ti Special Investigation Team on New Cases (SITN).
Gapo iti daitoy ket idauloan da ti proseso iti ‘fact-finding’, panaggun-od kadagiti ebidensiya ken panangipila kadagiti kaso a matakuatan ti imbestigasyon.
Nabilin ti special team a mangisubmitir ti regular progress reports da sadiay Department of Justice agingga maresolbar ti nasao a kaso ti pammapatay.
Nagballaag metten ni Undersecretary Jose Torres Jr. manipud Presidential Task Force on Media Security mainaig kadagitoy nga inisyatibo ken impasiguro na ti koordinasyonkadagiti prosecutor ken law enforcement agencies tapno maresolbar ti kaso.
