LA UNION – Imbutaktak ti controversial police colonel a ni Jovie Espenido iti Quad Committee a gaputi quota ken reward system, inabuso dagiti pulis iti bileg da a nagresulta iti panaglabsing ti karbengan pantao dagiti ribu ribu a biktima.
Sungbat daytoy ni Espenido iti salodsod ni Ako Bicol Rep. Raul Angelo “Jil” Bongalon.
Inwaragawag ni Espenido a makaliday nga adu iti inosente a sibilyan ti natay gaputi panagabuso dagiti pulis iti bileg dagitoy .
Impaganetget ni Espenido a dagiti tattao nga adda iti aglawlaw ni sigud a Presidente Rodrigo Duterte ket agum ti kuwarta ken iti posisyon.
Innayon pay ni Espinido a nakakaasi dagiti nagbalin a biktima, tapno makaawat ti reward.
Mamati ni Espenido nga adda panaglabsing iti karbengan pantao iti drug campaign ti Duterte administration.
Ammo ni Espenido nga idi kangitingitan ti nadara a drug war, adu ti nag protesta kontra iti panaglabsing ti karbengan pantao.
Kinumpirma na pay a kaadwan dagiti nailista a human rights violations ket napasamak idi kangitingitan ti nadara a drug war campaign iti sidong ti sigud nga administrasyon ni President Rodrigo Duterte.
Kinuna ni Espenido a dagiti tattao a nasinged iti sigud a president ken kakadwa na iti PNP ket inabuso da iti “tokhang” para iti bukod nga interes.
Inwaragawag ni Espenido a naaramid dagiti pulis nga aglabsing ti karbengan pantao tapno magun-od ti target dagitoy.
Nangituding ngamin ti quota iti liderato ti PNP manipud ti 50 agingga 100 a mapatay a drug suspect kada aldaw ket aganay P20,000.00 iti reward a maawat dagiti police officers.
Inlawlawag met ni Espenido a para kenkuana, iti ar-aramiden da a tokhang ket tapno sumuko dagiti drug suspect tapno maipasidong ti rehabilitation.
Innayon pay ni Espenido nga idi naka-assign idiay Ozamiz City, tinawagan isuna ni PNP chief nga itan ket Sen. Ronald dela Rosa a saan a garawen iti maysa a mayor agsipudta operator daytoy ti small town lottery ken maatap a drug lord.
Kinuna na a ti intelligence funds ken kuwarta manipud Philippine offshore gambling operations (POGOs) iti maus-usar tapno maponduan ti reward system.
Mapatta-patta a 30,000 drug suspects iti mapapati a natay iti anti-drug campaign ti Duterte administration.
