Agtultuloy iti panagrikurida ni DSWD Secretary Rex Gatchalian ditoy Ilocos Region tapno mangidanon ti tulong para kadagiti nakaro a naapektaran iti panagduprak ti Typhoon Emong ken iti panagraira ti Habagat.
Indaulwan ti sekratario iti panangipaay ti Family Food Packs (FFPs) ditoy probinsya ti La Union para kadagiti internally displaced persons (IDPs) wenno evacuees partikular idiay Poro ken Ilocanos Sur Evacuation Centers iti siyud ti San Fernando.
Malaksid iti impaay a tulong ti departamento, nangipaay pay ti hygiene kits iti Department of Health (DOH), bayat nga ipatpatungpal ti Philippine National Police (PNP) iti seguridad iti pakaisaysayangkatan ti distribusyon.
Iti panagsarungkar ni Secretary Gatchalian ditoy probinsya, nakataripnong na ni Provincial Governor Mario Ortega tapno talantanen iti agtultuloy a koordinasyon ken panagsungbat kadagiti pagkasapulan dagiti apektado a residente.
Kabayatanna, iti probinsya ti Pangasinan ken La Union iti umuna a sinarungkaran ti DSWD Secretary iti Northern Luzon.
Daytoy nga addang ket addaan panggep a masigurado iti kinasagana dagiti field offices, maitultuloy iti panangidanon ti direkta a tulong kadagiti evacuees, ken maamwan dagiti dadduma pay a kasapulan kadagiti lugar a naapektaran la unay dagiti napalabas a bagyo.
Iti sabali a bangir, iti panakiuman ti Bombo Radyo La Union kenni Ms. Marie Angela Gopalan, Regional Director ti DSWS Field Office 1, kenunana nga adda ti pakabuklan a 23,245 a pamilya iti apektado.
Naipaay metten dagiti 10,245 food packs para kadagiti umili ditoy probinsya kabinnulig dagiti lokal a gobierno ken iti City Government Unit.
Malaksid iti panangipaay ti tulong, mangisaysayangkat pay iti nasao nga ahensya ti monitoring kadagiti evacuation sites.
Kabayatanna, adda met iti maipaay a tulong kadagiti umili nga awan kadagiti evacuation sites.#
