BR LA UNION – Nainget a pinaglibakan ni Department of Trade and Industry (DTI) Secretary Cristina Roque iti maysa a dokumento nga agsirsirkulo iti social media a maipagarop a naglaun iti concessions wenno pammalubos manipud Pilipinas kasukat ti trade agreement iti Estados Unidos.
Segun kenni Roque, peke ti nasao a dokumento ken peke met ti pirmana iti daytoy. Inawaganna dayta a pinarparbo ken dakes a motibo, nangruna ket sensitibo ti isyu, a naigiddan pay iti panagbisita ni Presidente Ferdinand Marcos Jr. idiay Washington D.C. tapno makitaripnong kenni U.S. President Donald Trump.
Iti nasao a dokumento, nga inpost ti maysa a blogger iti Facebook, ket ibagbaga na a silulukat ti Pilipinas a mangkissay iti taripa kadagiti produkto ti U.S., mangpasayaat iti panagpuonan iti lana ken gas, ken mangipaay iti priviledge access kadagiti mineral resources.
Inallokoy ni Roque iti publiko a saanda nga iwaras ti dokumento ken ipamaysada laeng dagiti opisyal nga impormasyon manipud iti gobyerno.
Ni Roque ket karaman iti delegasyon ni President Marcos a nakitaripnong kadagiti opisyal ti Amerika para iti negosasyon iti taripa ken trade deal.
