Nairescue dagiti otoridad ti dua a mapapati a biktima ti human trafficking iti Kingdom of Jesus Christ (KOJC) compound sadiay Siudad ti Davao iti baet ti operasion ti pulisya a mangiserbi iti arrest warrant kontra ken ni Pastor Apollo Quiboloy.
Iti umuna a report, inaramid ti Philippine National Police Women and Children Protection Desk ken ti Department of Social Welfare and Development (DSWD) Region 11 ti rescue operation.
Iti simmaruno a report, kinuna ni PNP Regional Office (PRO) 11 spokesperson Police Major Catherine dela Rey a dagiti mapapati a biktima ket maysa a 21-anyos a lalaki a taga-Samar ken maysa a babai manipud iti ili ti Midsayap, Cotabato.
Inlawlawag ni Dela Rey a narescue dagiti dua a mapapati a biktima kalpasan a nagpatulongda ken dagiti kakabagianda iti polis.
Innayon ti PRO 11 spokesperson a kayat dagiti dua a naisalakan nga indibidual ti rummuar iti KOJC compound ngem malaplapdan dagitoy.
Kabayatanna, inlibak ni KOJC legal counsel Attorney Israelito Torreon dagiti alegasion a nairaman ti KOJC iti human trafficking.
Sinnerek dagiti PRO 11 units iti KOJC compound sadiay Davao City idi agsapa ti Sabado tapno agserbi iti arrest warrant ken ti pugante a Pastor Apollo Quiboloy.
Sumangsango ni Quiboloy iti kaso babaen ti Section 5(b) ken Section 10(a) ti Republic Act 7610 wenno ti Special Protection of Children Against Abuse, Exploitation, and Discrimination Act.
Maipasango pay isuna iti kaso a non-bailable qualified human trafficking babaen ti Section 4(a) ti Republic Act No. 9208, as amended, ti korte idiay Pasig.
