LA UNION – Dinayyeg ti napigsa a 6.8 magnitude a gingined iti eastern Cuba idi Domingo, sumagmamano laeng nga aldaw kalpasan a dupraken ti hurricane Rafael a nanggubway ti nationwide blackout iti nasao a pagilian.
Segun iti United States Geological Survey, iti epicenter ti nasao a panagdayyeg ket nailista iti kaadayu a 25 miles abagatan ti ili ti Bartolomé Masó, Cuba.
Immuna ti dayta, dinayyeg ti 5.9 magnitude a gingined asideg ti nasao a lugar, wenno maysa nga oras sakbay iti maikadwa ken napigpigsa a panagdayyeg.
Segun kenni Cuban President Miguel Diaz-Canel, nagresulta ti panagdayyeg iti sumagmamano nga insidente ti landslide, nadadael dagiti linya ti koryente, babbalay ken buildings, a maibilang a da-anen ken narukop.
Segun kadagiti local residents, daytoy iti kapigsaan a gingined a napuotan da iti unos ti panagbiag da.
Nupay kasta, awan ti naipaulog a tsunami advisory ken saan pay a masinunuo nu adda nadangran wenno natay iti gingined.
Kabayatanna, iti kapital ti Cuba nga Havana ket saan a naapektaran ti napigsa ken nagsaruno a gingined.
