BR LA UNION – Maysa a green revolution out of necessity iti mapaspasamak iti kalsada idiay kabisera ti Cuba bayat a ngumin-ngina ken bumasbassit iti supply a gasolina gapu iti kumarkaro a fuel crisis, isunga adu a driver ken commuters iti saan nga agus-usar ita ti tradisyunal a taksi ken umak-alar da iti electric tricycles.
Kimmaro ti krisis kalpasan nga impataw ti Estados Unidos ti oil blockade, a nangpasardeng iti panag-serrek ti lana manipud iti kangrunaan a supplier ti Cuba a Venezuela, ken nakaigapuan ti nasaknap a panagkurang ti lana.
Gagangay idi a makita kadagiti kalsada idiay Havana dagiti taksi a paandaren ti gasolina, ngem gapu iti kinakurang ti suplay ken ngumatngato a presyo, adu a driver ti nang-aabandona kadagiti luganda.
Naamwan nga adda iti six ken eight-seater dagiti agbibiyahe nga electric tricycle, a masansan a nalaklaka ti plete, isunga daytoy ti patok ita kadagiti pasahero.
Nupay kasta, sumangsango latta iti parikut dagiti nasao a klase ti lugan, agsipudta agkasapolan met dagitoy ti koryente, ket maysa ti nasao a siyudad a makapad-padas iti panagpukaw ti koryente nga agpaut ti agingga 12 nga oras kada aldaw gapu iti kinakurang ti gasolina para kadagiti planta ti koryente, ket awan ti usaren a pag-charge.
Masansan nga urayen dagiti akinkukua nga agsubli ti power supply wenno agusarda kadagiti generator wenno solar panel a pag-charge kadagiti luganda.
