BR LA UNION – Nakatutok ti konseho barangay ti Baccuit Sur, Bauang iti dua a purok, a masansan a malayos ken narigat a bumaba ti danum iti tiyempo ti panagtutudo.
Partkular ditoy iti Purok 6 ken Purok 7, a narigat bumaba ti danum ti tudo ken agbalin a berde ken nangisit ti kolor ti danum gaputi kinabayag na nga ag-subside.
Gaputi dayta, mapilitan dagiti apektado a residente nga agusar ti bangka ken kayak, ken dadduma pay nga alternatibo nga arwaten tapno makarwar da iti pagtaengan dagitoy.
Iti pannakiuman ti Bombo Radyo La Union kenni Barangay Kagawad Joey Ferrer, inaklon na a maysa ti barangay da kadagiti malaylayos a lugar iti tiyempo ti panagtutudo ken bagyo, isunga nakaplastar dagiti plano ken masapol a nakasagana da a kanayon tapno maprotektaran dagiti umili iti masakopan da.
Impannakkel na pay ti inaramid da a kanayunan nga evacuation center, iti mismo nga abay ti barangay hall, a mabalin a pagkamangan dagiti maapektaran ti kalamidad.
Idi napalabas a tawen, iti Baccuit National High School ken Barangay Health Center ti agserserbi nga evacuation centers para kadagiti residente.
