Hinarang ti NAIA Inter-Agency Drug Interdiction Task Group (NAIA-IADITG) ti dua a taga-South Africa kalpasan a mapapati a ginandatda nga ipuslit ti P97,892,800 a gatad ti iligal a droga sadiay Ninoy Aquino International Airport (NAIA).
Agarup ala una ti parbangon idi kalman, Enero 17, nadlaw ti X-ray operator iti international arrivals area dagiti mapagduaduaan a banag iti bagahe ti dua a pasahero.
Dagus nga impakaammo daitoy ti operator iti NAIA Inter-Agency Drug Interdiction Task Group para iti kanayonan nga inspeksion.
Kabayatan ti manual inspection, nasarakan dagiti otoridad ti nasurok 14kg a methamphetamine hydrochloride wenno ad-adda a pagaammo kas “shabu” a nakalemmeng kadagiti nadumaduma a container kas iti handbag, potato chips biscuits, book compartments ken improvised pouches.
Naiturong itan dagiti nakumpiskar nga ebidensia iti Philippine Drug Enforcement Agency (PDEA) laboratory para iti confirmatory testing kalpasan ti proseso ti inventory.
Dagus a naarestar dagiti suspek ken adda da ita iti kustodiya ti PDEA, ken maidarumda iti panaglabsing iti Republic Act 9165 wenno Comprehensive Dangerous Drugs Act of 2002.
