BR LA UNION – Saan a bumaba iti 50 a tattao ti natay, agraman ti uppat nga ubbing nga agad-adal, kalpasan ti napigsa a panagtudo ken panagreggaay ti daga idiay ti Eastern Cape ti South Africa, kinuna dagiti opisiyal.
Kinuna ni Eastern Cape Premier Lubabalo Oscar Mabuyane, kabilang dagiti natay dagiti uppat nga ubbing, maysa a drayber ken maysa a konduktor ti school minibus nga inyanud ti layus iti asideg ti siyudad ti Mthatha. Uppat pay nga estudyante ti mabirbirok, idinto a tallo ti naisalbar.
Posible a manayunan pay ti bilang dagiti natay gaputa agtultuloy ti search and rescue operations kadagiti lugar a nakaru a naapektaran.
Kinuna dagiti opisyal nga adu a komunidad ti nalayos ken ginasut a pamiliya ti temporaryo nga agtalinaed kadagiti evacuation center iti tengnga ti nalamiis a paniempo. Naapektaran pay iti imprastruktura, agraman iti suplay ti koryente ken danum.
Kinuna ni South African President Cyril Ramaphosa nga agtultuloy ti panangsungbat ti National Disaster Management Center iti krisis.
Kabayatanna, nagpanawagan dagiti opisyal iti kanayunan nga alikamen ken tulong, nangruna ta maysa laeng a helicopter ti agdama a maus-usar iti nasao a lugar.
